ჩვენი გვერდი "ფეისბუქზე"
პარტნიორები
ტრიბუნა
თავფურცელი
ანალიზი
09.03.2011
„საარჩევნო გარემოს“ შეცვლა არაფერს შეცვლის

ბოლო თვეებში საპარლამენტო და პარლამენტს გარეთ არსებული ოპოზიციის საყვარელ სათამაშოდ იქცა ე.წ. საარჩევნო გარემოს გაუმჯობესების იდეა. ისინი ამაში ხედავენ იმის საშუალებას, რომ სააკაშვილის ხელისუფლება „უმკივნეულოდ“, ანუ რევოლუციების გარეშე ჩამოაცილონ მმართველობის სადავეებს.

ამ მიზნით მუსირებს არჩევნების დროს „ბიომეტრიული პასპორტების“ გამოყენების იდეა, ეს კი, ზოგიერთი ოპოზიციური ლიდერის მტკიცებით, არჩევნების გაყალბებას შეუშლის ხელს. ამომრჩეველს უხსნიან და არწმუნებენ, რომ სააკაშვილის „კულტურულად“ და „ცივილიზებულად“ მოშორება სჯობს რევოლუციების და უწესრიგობების მოწყობას, რაც, მათი თქმით, ქვეყანას „დაღუპავს“.

თუმცა ეს მოსაზრება – საარჩევნო გარემოს გაუმჯობესების გზით სააკაშვილის დამარცხება – კრიტიკას ვერ უძლებს. წინა არჩევნებმა (2010 წლის მაისში) ძალიან კარგად აჩვენა, რომ თბილისში ოპოზიციის დამარცხების მიზეზი გახდა არა ე.წ. კარუსელები და ბიულეტენების ჩაყრა ურნებში, რასაც მოქკავშირის ეპოქაში ჰქონდა ხოლმე ადგილი, არამედ სულ სხვა მიზეზები.

საქართველოში არსებობს ავტორიტარული, გარკვეულ პარამეტრებში, შეიძლება ითქვას, ტერორისტული რეჟიმი, რომელსაც არჩევნების პროცესზე და ამომრჩეველზე ზემოქმედების უამრავი ბერკეტი გააჩნია. ეს მეთოდები არ შემოიფარგლება მხოლოდ საარჩევნო „კარუსელებით“ და პირდაპირი ფალსიფიკაციებით. არსებობს, მაგალითად, „ციცო დეიდების“ ინსტიტუტი, რომელიც წარმატებით გამოიცადა წინა არჩევნებზე, საინფორმაციო ზომბირება ელექტრონული მას–მედიის გამოყენებით, „ნარკობარიგების“, ციხეში მყოფების გამოყენება ხმების შესაგროვებლად და სხვა მრავალი. მთლიანობაში ამას უწოდებენ „ადმინისტრაციულ რესურსს“.

ამიტომ, ოპოზიციის ყურადღების კონცენტრაცია ადმინრესურსის მხოლოდ ერთ ფაქტორზე – საარჩევნო სიებით მანიპულაციაზე ხელისუფლების მხრიდან – ნიშნავს იმას, რომ ეს ოპოზიცია დაინტერესებულია მხოლოდ ბრძოლის იმიტაციით და არა რეალური ბრძოლით. ეს კი, თავის მხრივ, მიუთითებს იმაზე, რომ აშშ–ს ადმინისტრაციას ჯერ არ მიუღია საბოლოო გადაწყვეტილება სააკაშვილის რეჟიმის მიმართ და ეს რეჟიმი კვლავაც სარგებლობს ამერიკის მხარდაჭერით. ასეთ პირობებში ვერც ბიომეტრიული და ვერც „ზოომეტრიული“ პასპორტები ვერაფერს შეცვლის და მხოლოდ ხალხის ოპოზიციურად განწყობილი ნაწილისთვის ფუჭი იმედების მიცემისთვის გამოდგება, რომ ეს ადამიანები საარჩევნო უბნებში მიიყვანონ. ამით კი არჩევნებზე შედარებით ნორმალური გამოცხადება იქნება უზრუნველყოფილი და ბიულეტენების პირდაპირ ჩაყრის აუცილებლობაც მოიხსნება.

ამავე დროს, სააკაშვილის და ნაცმოძრაობის რეალურ კონკურენტებს – ქართული დიასპორის წარმომადგენლებს – გადაკეტილი აქვთ გზა არჩევნებში მონაწილეობისკენ. პროდასავლური ოპოზიცია კი, როგორც მრავალგზის დავრწმუნდით, მმართველი რეჟიმის რეალური კონკურენტი არაა.

თემატური სტატიები
პარტნიორები
"სკივრი"